بادینان دەیلی:
رێڤەبەرییا بەنداڤا دهۆکێ ئاگەهدارییەکا گرنگ ئاراستەی وەلاتییان و خودانێن کاران دکەت و ڕادگەهینیت کو ژبەر بارانێن بۆش و نێزیکبوونا سەرداچوونا بەنداڤێ، پێدڤییە هەمی ل جهێن نێزیک رویباری دویر بکەڤن.
ئەڤرۆ سێشەمبی ٢٤ێ ئادارا ٢٠٢٦ێ، رێڤەبەرییا بەنداڤا دهۆکێ د بەیاننامەیەکێ دا ڕاگەهاند: “ژ ئەگەرێ هاتنا پێلەکا بارانێن بۆش د ڕۆژێن بهێت دا، ئەگەرەکێ زۆر یێ هەی کو ئاڤا بەنداڤێ سەردا بچیت، لەوما داخوازێ ژ وەلاتییان دکەین ل دەردۆرێن رویبارێ گەلی هشیار بن.”
د ئاگەهدارییێ دا ب شێوەیەکێ تایبەت داخواز ژ خودانێن کافێ، خوارنگەهـ، هۆتێل و مۆتێلان، پارکێن راوەستاندنا ترومبێلان، جۆتیاران و هەر جهەکێ دکەڤیتە سەر ڕێڕەوێ رویباری هاتییە کرن کو بۆ پاراستنا گیان و سامانێ خۆ، ژ دەڤەرا گەلی هەتا دویماهییا رویبارێ هشکەروویی (ژ ڕەخێ تاخێ کانی خشمانا) دویر بئێخن.
ئەڤ هۆشدارییە د دەمەکێ دایە کو ئەڤ سالە ل هەرێما کوردستانێ رێژەیەکا زۆر و باش یا بارانێ بارییە. ل دویڤ زانیارییێن رێڤەبەرییا بەنداڤێ، د نوکە دا تەنێ ٣ مەتر ماینە کو بەنداڤ ب تەمامی پڕ ببیت و ئاڤ ژێ بڕێژیت.
بادینان دەیلی | ٢٠٢٦
