بادینان دەیلی:
ژێدەرەکێ تایبەت ئاشکرا کر کو ل ناڤەڕاستا ڤێ حەفتیێ، وەزارەتا دارایی یا هەرێما کوردستانێ لیستا مووچەیێ فەرمانبەران ڕەوانەی بەغدا دکەت، ب مەبەستا هویربینیکردن و خەرجکرنا شایستەیێن دارایی.
ل دویڤ زانیارییێن ب دەست “بادینان دەیلی” کەفتین، ئەڤرۆ یان سوبەهی دێ لیستا مووچەیی بۆ بەغدا هێتە ڕەوانەکرن. د نوکە دا هەمی پێداچوون و هویربینیێن پێدڤی ب دوماهی هاتینە و تەنێ هندەک هویرکارییێن تەکنیکی یێن دوماهییێ ماینە. هەروەسا هاتە دیارکرن کو “تەرازوویا پێداچوونێ” ژی هاتییە ئامادەکرن و دێ ل گەل لیستێ هێتە هنارتن.
ل دویڤ ڕێکارێن هاتینە دیارکرن، پشتی گەهشتنا لیستێ و تەرازوویا پێداچوونێ، حکومەتا ئیراقێ دێ دەست ب پرۆسەیا هویربینیێ کەت. پاشان دێ داخوازێ ژ وەزارەتا دارایی یا هەرێمێ کەت کو بڕێ ١٢٠ ملیار دیناران ژ داهاتێ ناڤخۆ ڕادەست بکەت.
هەر دەما ئەڤ ڕێکارە ب دوماهی هاتن، بەنکا فیدرالی دێ پارەیی بۆ سەر هەژمارا بانکی یا وەزارەتا دارایی یا هەرێمێ ڕەوانە کەت. ژ لایێ خۆ ڤە ژی، حکومەتا هەرێما کوردستانێ لیست ئامادە کرییە و ب گەهشتنا پارەیی، د ماوێ دو تا سێ ڕۆژان دا دێ تمامیا مووچەیی ل سەر فەرمانبەران هێتە دابەشکرن.
بادینان دەیلی | ٢٠٢٦
