بادینان دەیلی (Badinan Daily):
پشتی ڕاوەستیانەکا دوو حەفتی، بڕیارە خولێن تەپا پێ یێن کوردستانێ دووبارە دەستپێبکەنەڤە. دارەوان حەمە، پەیڤدارێ ئێکەتیا تەپا پێ یا کوردستانێ بۆ ڕادۆیا (رووداو سپۆرتس) ڕاگەهاند کو “پشتی بێهنڤەدانێن جەژنێ، دێ دەست ب یاریێن خولێن کوردستانێ کەینەڤە.”
خولا نایاب و ململانێیا مانێ
خولا نایابا کوردستانێ ١٩ گەڕ دەرباز کرینە و تەنێ سێ گەڕ یێن ماین کو خول ب تەمامی ب دوماهی بهێت. هەرچەندە یانەیا “هەندرێن” ب فەرمی و بەری وەخت نازناڤێ پاڵەوانیا خولێ بۆ خۆ مسۆگەر کریە، لێ د نوکە دا ترس و دڵەڕاوکی ل دەڤ وان یانەیانە یێن کو شەڕێ مانەوەی دکەن د خولا نایاب دا دا کو دابەزی نەبن.
خولا پلە ئێک د گەرماتیا خۆ دایە
هەروەسا خولا پلە ئێکێن کوردستانێ ژی تەنێ چار گەڕێن دی یێن ماین و کێبڕکێ د ئاستەکێ گەلەک بلند دایە. ل دویڤ یاسایا خولێ، چار یانە دێ سەرکەفن بۆ خولا نایاب و چار یانە ژی دێ دابەزن بۆ خولا پلە دووێ، ئەڤە ژی وای ل یانەیان کریە کو چاڤێ وان ل خالێن ڤان گەڕێن دوماهیێ بیت.
کەنێ دێ یاری دەستپێکەنەڤە؟
دارەوان حەمە ل دۆر دەمێ دەستپێکرنەڤێ گۆت: “هەتا نوکە ب هوێری دیار نینە کا چ ڕۆژ دێ دەستپێکەنەڤە، لێ ب بێگۆمان پشتی بێهنڤەدانێن جەژنێ دێ بیت. یان ل دەسپێکا مەها بهێت یان ژی ل دوماهیا ڤێ مەهێ، لیژنەیا پێشبڕکێیان دێ د چەند ڕۆژێن بهێت دا بڕیارا دوماهیێ ل سەر ڤێ چەندێ دەت.”
یاریێن بێ هاندەر و پاراستنا سلامەتیێ
دوو گەڕێن بووری یێن خولێن کوردستانێ بێی ئامادەبوونا هاندەران هاتنە ئەنجامدان. پەیڤدارێ ئێکەتیا تەپا پێ دیار کر کو ئەڤ بڕیارە تەنێ بۆ پاراستنا سلامەتیا وەلاتیان بوویە و گۆت: “وەک چەوا یارییا هەولێر و دیالە ل خولا ستێرەیێن عیراقێ بێ هاندەر بوو، مە ژی نەڤێت جوداهی د ناڤبەرا دەڤەران دا هەبیت و سلامەتیا هاندەران مەبەستا مە یا سەرەکیە.”
خولا پلە دوو هاتە پاشخستن
ژ لایەکێ دی ڤە، ب ئەگەرێ بارودۆخێ دەڤەرێ و کێشەیێن سیاسی و سەربازی، ئێکەتیا تەپا پێ بڕیار دا خولا پلە دوویا کوردستانێ بۆ مەها ١٠ (تشرینا ئێکێ) یا ئەڤساڵە پاش بێخیت، و یانەیێن بەشدار ژی ئەڤ بڕیارە پەسەند کریە.
Badinan Daily – ژێدەرێ تە یێ باوەرپێکری بۆ نووچەیێن وەرزشی یێن کوردستانێ
