بادینان دەیلی (Badinan Daily):
د ڕوودانەکا دلتەزین دا ل وەڵاتێ کۆلۆمبیا، فرۆکەکا سەربازی کەفتە خار و د ئەنجام دا ب دەهان سەربازان گیانێ خۆ ژ دەست دان و ژمارەکا دی ژی بێسەروشوونن.
ئەڤرۆ سێشەمبی، ٢٤ێ ئادارا ٢٠٢٦، هوگۆ ئەلیخاندرۆ لۆپێز بارێتۆ، فەرماندێ هێزێن چەکدارێن کۆلۆمبیا ڕاگەهاند کو د ئەنجامێ کەفتنا وێ فرۆکێ دا ٦٦ کەسان گیانێ خۆ ژ دەست دایە، هەروەسا ئاماژە ب وێ یەکێ کر کو “هەتا نوکە ٤ سەرباز یێن بێسەروشوونن”.
ژێدەرەکێ سەربازی ل کۆلۆمبیا هویرکاریێن پتر بەلاڤکرن و دیار کر کو د ناڤ قوربانیان دا ٥٨ سەرباز، ٦ کارمەندێن هێزا ئاسمانی و ٢ ئەفسەرێن پۆلیس هەنە.
ژ لایێ خۆ ڤە، کارلۆس کلارۆس، بەرپرس د حکومەتا کۆلۆمبیا دا بۆ ئاژانسا (RCN) ڕاگەهاند کو هەمی هەوڵ دهێنە دان بۆ ڤەگوهاستنا سەربازێن بریندار و گۆت: “هەتا نوکە مە چارەسەری بۆ ٨١ برینداران کریە.”
ل دویڤ لێدوانێن جەنەڕاڵ کارلۆس فێرناندۆ سیلڤا، سەرۆکێ هێزا ئاسمانی یا کۆلۆمبیا، کۆمێ ١١٤ سەرباز د ناڤ فرۆکێ دا بوون، زێدەباری ١١ ئەندامێن تێما فرۆکەڤانی (کو دکەتە ١٢٥ کەس).
جێگرێ سەرۆکێ شارەڤانیا “پۆرتۆ لێگویزامۆ” ل پارێزگەها “پۆتۆمامۆ” دیار کر کو فرۆکە ژ جۆرێ (هێرکۆلیس C-130) بوو و ڕۆژا دووشەمبی پشتی دەمەکێ کێم ژ هەلفرینا وێ کەفتیە خار. دەسهەلاتدارێن وی وەڵاتی دەست ب ڤەکۆلینێن هویر کرینە بۆ دیارکرنا ئەگەرێن سەرەکی یێن ڤێ کارەساتێ.
Badinan Daily – ژێدەرێ تە یێ باوەرپێکری بۆ نووچەیێن جیهانی
