بادینان دەیلى:
فراکسیۆنا پارتی دیموکراتی کوردستان ل پەرلەمانێ عیراقێ بڕیار دا پشکداریێ د کۆمبوونا ئەڤشەڤە یا پەرلەمانی دا نەکەت و ئەوێ کۆمبوونێ ب “نەیاسایی” وەسف دکەت.
ئەڤرۆ سێشەمبی، 17ێ ئادارا 2026ێ، شێروان دووبەردانی، پەرلەمانتارێ فراکسیۆنا پارتی ل پەرلەمانێ عیراقێ ڕاگەهاند کو وەک فراکسیۆنا پارتی، ئەو پشکداریێ د کۆمبوونا ئەڤشەڤە دا ناکەن؛ چونکی کۆمبوون یا نەیاساییە و جێگرێ دویێ یێ سەرۆکێ پەرلەمانی ڕەزامەندی ل سەر کارنامەیا کۆمبوونێ نەدایە.
ل دویف پەیڕەوێ ناڤخۆ یێ پەرلەمانێ عیراقێ، پێدڤییە دەستەیا سەرۆکاتیا پەرلەمانی (کو ژ سەرۆکێ پەرلەمانی و هەردوو جێگرێن وی پێکدهێت) ڕەزامەندیێ ل سەر کارنامەیا روینشتنێن پەرلەمانی بدەن. لێ وەک شێروان دووبەردانی ئاشکرا کری، فەرهاد ئەترووشی جێگرێ دویێ یێ سەرۆکێ پەرلەمانی ڕەزامەندی ل سەر ئەنجامدانا ڤێ روینشتنێ نەدایە.
ئەو پەرلەمانتارێ پارتی ئەگەرێن دی یێن پشکدارینەکرنا وان روون دکەتەڤە و دبێژیت: “ئەم پێشبینی دکەین کو پشکا هەرێما کوردستانێ و پرسا هنارتنا پەترۆلێ ب شێوەیەکێ دادپەروەرانە یەک لایى نەبیت، لەورا ئەم ب تەمامی ڤى شێوازى ڕەتدکەین.”
دووبەردانی زێدە کر ژی کو پێدڤییە حکومەتا بەغدا ڕاگەهاندنا سەرۆک مەسعوود بارزانى بۆ چارەسەرکرنا کێشەیێن د ناڤبەرا هەولێر و بەغدا دا بکەتە بنەما بۆ هەر بڕیارەکێ، و ئەو ئامادەنە ل سەر وی بنەمایى گفتوگۆیێ ل گەل بەغدا بکەن.
بڕیارە ئەڤشەڤە (سێشەمبی، 17ێ ئادارێ) پەرلەمانێ عیراقێ کۆمبوونەکا تایبەت ل سەر پرسا هنارتنا پەترۆلا عیراقێ ئەنجام بدەت و داخواز کرییە کو هەردوو وەزیرێن پەترۆلا عیراقێ و سامانێن سروشتی یێن هەرێما کوردستانێ د وێ کۆمبوونێ دا پشکدار بن.
