بادینان دەیلى:
پشتی ڤەکرنا دەرگەهێن نێڤدەولەتی یێن پەروێزخان و حاجی ئۆمەران و بەردەوامییا کار ل دەرگەهێ باشماخ، بڕیار هاتە دان سێ دەرگەهێن دی یێن سنوورى د ناڤبەرا هەرێما کوردستانێ و ئیرانێ دا بهێنە ڤەکرن. بەرپرسەک ل ئێک ژ دەروازەیان دبێژیت: “ئیرانێ ئەم ئاگەهدار کرینە کو بڕیارا ڤەکرنێ هاتییە دان.”
پشتی چەند ڕۆژان ژ ڕاوەستانا کارى ژبەر بارودۆخێ شەڕی، ل 11ێ ئادارێ دەرگەهێ نێڤدەولەتی یێ پەروێزخان و ل 15ێ ئادارێ ژی دەرگەهێ نێڤدەولەتی یێ حاجی ئۆمەران هاتبوونە ڤەکرن.
ڕۆژا دووشەمبی 16ێ ئادارا 2026ێ، ڕێڤەبەرییا کۆمەلگەها دەرگەهێ سەیرانبەن ل پارێزگەها سلێمانیێ ڕاگەهاند: “ئەم وەلاتییان ئاگەهدار دکەین کو هاتنوچوون بۆ گەشتیاران و هەلگرێن پاسپۆرتێن ئیراقی، بیانی و ئیرانی هاتییە ڤەکرن.”
د بەیاننامەیێ دا هاتییە کو ئاساییبوونا هاتنوچوونێ دێ وەک جاران بیت؛ ژ دەمژمێر 07:30ێ سپێدێ هەتا 01:30ێ پشتی نیڤرۆ، بتنێ ڕۆژێن ئەینی و بێهنڤەدانێن فەرمی یێن کۆمارا ئیسلامی یا ئیرانێ دێ هاتنوچوون هێتە ڕاوەستاندن.
هەر ئەڤرۆ، دەرگەهێ پشتە ل ئیدارەیا سەربەخۆ یا گەرمیان ڕاگەهاند کو بڕیار هاتییە دان ڕۆژا 17ێ ئادارێ دەرگەهێ وان بهێتە ڤەکرن و لڤینا بازرگانی ئاسایی ببیت.
ژ لایەکێ دی ڤە، دەرگەهێ کێلێ ل ئیدارەیا سەربەخۆ یا ڕاپەرین ئێک بوو ژ وان دەرگەهێن کو هاتبوو گرتن. عەباس عەزیز باپیر، ڕێڤەبەرێ گومرکا ئیدارەیا ڕاپەرین گۆت: “دەرگەهێ کێلێ هەر ژ دەستپێکا شەڕی گرتییە، لێ ئەڤرۆ ئالییێ ئیرانی ئەم ئاگەهدار کرینە کو دێ ڤەکەن و هاتنوچوون دێ ئاسایی بیت.” ناڤبری زێدە کر ژی کو ل هیڤییا سوبەهی یان دوسبە نە ڕەوش ب تەمامی ئاسایی ببیتەڤە.
ل سنوورێ پارێزگەها هەلەبجە ژی دەرگەهێ شووشمێ یێ ڤەکرییە. حەمید بارام، ڕێڤەبەرێ ناحییا بیارێ گۆت: “دەرگەهێ مە ل هەمبەر بازرگانی و گەشتیاریێ ڤەکرییە؛ ل دەستپێکا شەڕی بۆ چەند ڕۆژەکان هاتبوو گرتن و پاشی هاتە ڤەکرن.”
پێدڤی ب گۆتنێ یە کو ل گەل دەستپێکرنا شەڕێ د ناڤبەرا ئەمریکا و ئسرائیلێ دژی ئیرانێ ل 28ێ مەها شوباتا بوری، کۆمارا ئیسلامی یا ئیرانێ هەمی دەرگەهێن خۆ یێن سنوورى د گەل هەرێما کوردستانێ گرتبوون، ژبلی دەرگەهێ نێڤدەولەتی یێ باشماخ کو کار تێدا بەردەوام بوو.
