بادینان دەیلى:
سەرۆکێ هەرێما کوردستانێ، نێچیرڤان بارزانى د پەیوەندییەکا تەلەفۆنی دا ل گەل سەرۆکا کۆمسیۆنا ئەورۆپا، ئۆرسۆلا ڤۆن دێر لاین، رەوشا ناوچەیێ گۆتوبێژ کر. نێچیرڤان بارزانى دوپات کر کو هەرێم نابیتە پشکەک ژ ئالۆزییان، و ڤۆن دێر لاین ژی ڕاگەهاند کو سەقامگیرییا هەرێمێ بۆ وان یا گرنگە.
ڕۆژا دووشەمبی 16ێ ئادارا 2026ێ، نێچیرڤان بارزانى، سەرۆکێ هەرێما کوردستانێ پەیوەندییەکا تەلەفۆنی ل گەل ئۆرسۆلا ڤۆن دێر لاین، سەرۆکا کۆمسیۆنا ئەورۆپا ئەنجام دا. ل دویف ڕاگەهاندنا سەرۆکاتیا هەرێمێ، د ڤێ پەیوەندیێ دا باس ل دوماهی پێشهاتێن ئالۆز یێن ناوچەیێ و کاریگەرییێن شەڕی هاتەکرن.
هەردو ئالی هاوڕا بوون ل سەر گرنگییا بەردەوامییا هاریکارییان بۆ ڕووبەڕووبوونا ئاستەنگان و پاراستنا سەقامگیریێ و پەنابرن بۆ چارەسەرییێن ئاشتیانە بۆ کێشەیان.
سەرۆک نێچیرڤان بارزانى د پەیوەندیێ دا تەکەزی ل سەر وێ یەکێ کر کو “هەرێما کوردستانێ پشکەک نینە ژ ئالۆزییان و دێ وەک هەردەم فاکتەرێ ئارامی و سەقامگیریێ بیت.” هەروەسا سوپاسیا پشتەڤانییا بەردەوام یا ئێکەتیا ئەورۆپا بۆ ئیراقێ و هەرێما کوردستانێ کر.
ژ لایێ خۆ ڤە، ئۆرسۆلا ڤۆن دێر لاین ڕاگەهاند کو سەقامگیرییا ئیراقێ و هەرێما کوردستانێ جهێ گرنگیپێدانا ئێکەتیا ئەورۆپایە و گۆت: “ئەم وەک هەڤپشکەکێ گرنگ د ناوچەیێ دا تەماشەی هەرێما کوردستانێ دکەین.”
هەروەسا سەرۆکا کۆمسیۆنا ئەورۆپا د هەژمارا خۆ یا تۆرێ جڤاکی یا “ئێکس” دا ئاماژە ب وێ یەکێ کر کو وێ و نێچیرڤان بارزانى باس ل رەوشا ئێمناهییا رۆژهەلاتا ناڤین و ناوچەیا کەنداڤی کرییە. وێ زێدە کر: “رۆڵێ هەرێما کوردستانێ ئەڤرۆ وەک هێزەک کو فاکتەرێ سەقامگیریێ یە، ژ هەر دەمەکێ دی گرنگترە.”
ل دوماهیێ، ڤۆن دێر لاین دیار کر کو ئێکەتیا ئەورۆپا یا ڕژدە ل سەر کارکرنێ ل گەل هەرێمێ بۆ پاراستنا وێ پێشکەفتنا ب زەحمەت هاتییە دەستڤەئینان و دێ ل سەر پشتەڤانییا خۆ بۆ هەرێمێ و ئیراقێ بەردەوام بن.
