بادینان دەیلى:
محەمەد شیاع سوودانى، سەرۆکوەزیرێن عیراقێ، یادا تاوانێن رژێما بەعس ب بیر ئینا؛ ژ وان ژى کۆمکوژیا هەلەبجە و شاڵاوێن ئەنفالێ، و راگەهاند کو رێکێ نادەن دیکتاتۆریەت جارەکا دى بزڤریتە ڤى وەلاتی.
ئەڤرۆ دووشەمبی، 16ێ ئادارا 2026ێ، محەمەد شیاع سوودانی د سالڤەگەڕا کیمیابارانکرنا باژێرێ هەلەبجە دا پەیامەک بەلاڤکر و تێدا گۆت: “ئەڤرۆ ئەم یادا وان تاوانان دکەین کو رژێما تاوانکار یا سەدامی دەرهەق ب رۆڵەیێن گەلێ مە یێ خۆڕاگر ئەنجام داین.”
سوودانى د پەیاما خۆ دا ئاماژە ب وێ یەکێ کر کو گۆرێن ب کۆم، راپەرینا شەعبانیە، کۆمکوژیا هەلەبجە، شاڵاوێن ئەنفالێ و تیرۆرکرنا زانایان و هێزێن ئایینی و نشتیمانى، هەموو لاپەرێن خویناوییێن مێژوویا عیراقێ نە و نیشانا دڕندایەتییا وێ رژێمێ بوون.
د پشکەکا دی یا پەیامێ دا، سەرۆکوەزیرێن عیراقێ باسی قۆناغا پشتی رووخانا رژێمێ کر و دیار کر: “سەرەڕاى وان هەموو قوربانییان، عیراقی پشتی رووخانا دیکتاتۆریەتێ ژى د بەردەوام بوون د قوربانیدانێ دا، دەمێ ب مێرانى رووبەڕوویێ کردایێن تیرۆرستى و تاوانێن رێکخستى یێن پاشمایێن دیکتاتۆریەتێ و چەتەیێن داعشێ بووین.” هەروەسا گۆت ژى کو داعش درێژەپێدەرێ تاوانێن رژێما بەرێ بوو.
ئەڤرۆ 16ێ ئادارا 2026ێ، 38 سال ب سەر تاوانا کیمیابارانکرنا هەلەبجە دا دەرباز دبن، کو ل 16-3-1988ێ ژ لایێ رژێما بەعس ڤە هاتە ئەنجامدان. د ڤێ کارەساتێ دا پتر ژ 5000 هاوەلاتییێن سڤیل شەهید بوون و ب هزاران ژى بریندار بوون.
ئەڤ هێرشە پشکەک بوو ژ شاڵاوێن بەدناڤێن ئەنفالێ دژى گەلێ کورد، کو تێدا پتر ژ 182 هزار مرۆڤێن بێتاوان هاتنە کۆمکوژکرن و بێسەروشوێنکرن. د ڤێ یادێ دا، سەرکردایەتیا هەرێما کوردستانێ و سەرۆکاتیا کۆمارا عیراقێ جەخت ل سەر پێدڤیا قەرەبووکرنا مادى و مەعنەوى یا قوربانییان دکەن.
