ژ پێخەمەت روو ب روو بوونا قەیرانا ئابووری و قەرەبووکرنا زیانێن ملیاران دۆلاران، حکومەتا عێراقێ داخوازا رێککەفتنەکا بلەز ل گەل حکومەتا هەرێما کوردستانێ دکەت بۆ دەستپێکرنەڤەیا هناردەکرنا نەفتا کەرکووکێ ب رێکا بۆریێن هەرێمێ بۆ بەندەرێ جەیهان یێ تورکی.
ل دویڤ راپۆرتەکا رۆژنامەیا “زە ناشناڵ”، ئەگەر حکومەتا فیدراڵی بشێت ل گەل حکومەتا هەرێمێ بگەهیتە رێککەفتنێ، دێ شێت دەست ب هناردەکرنا نەفتێ کەتەڤە، ئەوا کو ب ئەگەرێ ململانێ و ئالۆزیێن رۆژهەلاتا ناڤین راوەستیای. بەرپرسان بۆ وێ رۆژنامەیێ راگەهاندیە، رێککەفتنا ناڤبەرا بەغدا و هەولێرێ بۆ هناردەکرنا نەفتا خاڤ ژ کێلگەهێن کەرکووکێ بۆ بەندەرێ جەیهان، دێ بیتە قەرەبوو بۆ وان زیانێن ژ ئەگەرێ هێرشێن ل سەر عێراقێ و گەمارۆیا ئیرانێ بۆ سەر گەروویێ هورمز پەیدابوین، ب تایبەتی پشتی کو هێرشێن ئیرانێ بۆ سەر کەشتیێن نەفتێ ل بەسرە، بەرپرسێن عێراقی نەچارکرین ل دەستپێکا ڤێ حەفتیێ هناردەکرنا نەفتێ ل هەمی هێلێن وەلاتی رابگرن.
بەرپرسێن حکومەتا عێراقێ بۆ “زە ناشناڵ” دیار کریە، کو عێراق ژ بەر پشتبەستنا وێ ب نەفتێ (کو 90%ێ بودجەی پێکدئینیت) د بەردەم مەترسیەکا سەختا ئابووری دایە. ئەگەر راوەستاندنا بەرهەمئینانا نەفتێ یان گەمارۆیا سەر گەروویێ هورمز بەردەوام بیت، بژاردەیێن بەغدا دێ کێم بن و تەنێ رێکا بۆریا عێراق-تورکیا دێ مینیت، لێ ئەو بژاردە ژی رێگریێن خۆ هەنە.
ل دویڤ راپۆرتێ، وەزارەتا نەفتا عێراقێ ل دەستپێکا حەفتیا دەربازبووی نامەیەک بۆ حکومەتا هەرێما کوردستانێ هنارتیە و داخواز کریە رۆژانە لانی کێم 100 هزار بەرمیلێن نەفتا خاڤ ژ کەرکووکێ ب رێکا بۆریێن هەرێمێ بۆ جەیهان بهێنە ڤەگواستن. نوێنەرێن کورد ژی دبێژن، ئەو ئامادەنە رێککەفتنێ بکەن ب مەرجەکێ: دڤێت بەغدا وێ گەمارۆیا لسەر دۆلارێ ئەمریکی کو بەری دوو مەهان خستبووە سەر هەرێمێ هەلگریت و داهاتێ بازرگانی یێ هەرێمێ بزڤرینیت.
بەرپرسەکێ بلند یێ کورد بۆ رۆژنامەیێ گۆتیە: “ئەم رێککەفتنێ دخوازین، مە ب شێوەیەکێ واقیعی سەرەدەری دگەل ڤێ قەیرانێ کریە و نوکە حکومەتا عێراقێ هەست ب قەیرانا نەختینەیی (کاش) کریە.” هەروەسا ئاماژە کر کو هەرێمێ پێشنیازەکا گونجای خستیە سەر مێزا گفتوگۆیێ و دڤێت بەغدا ژی د ڤێ قەیرانێ دا پراگماتیانە سەرەدەریێ بکەت تا کێشێن مەزن دهێنە چارەسەرکرن.
هەروەسا بەرپرسەکێ عێراقی ئاماژە ب وێ یەکێ کر، کو عێراقێ چەندین دەلیڤە ژ دەست دانە، ژ وان ژی پڕۆژەیێ بۆریا عەقەبە، و نوکە تەنێ بژاردەیا بۆریا کەرکووک-جەیهان مایە کو پێدڤی ب ئیرادەیەکا سیاسی هەیە بۆ جێبەجێکرنێ.
