وەزارەتا دەرڤە یا عێراقێ راگەهاند کو ب هەماهەنگی دگەل لایەنێن پەیوەندیدار، ئەو وەلاتیێن عێراقی یێن ل چەند وەلاتێن دەرڤە گیرخوارین، هاتنە ڤەگەراندن بۆ ناڤ وەلاتی.
ئەڤرۆ ئێکشەمبی، 15ێ ئادارا 2026ێ، وەزارەتا دەرڤە یا عێراقێ د بەیاننامەیەکێ دا ئاشکرا کر، ئێکەم کاروانێ وەلاتیێن عێراقی ل وەلاتێ میسرێ، ب رێکا دەروازێ سنووری یێ “عەرعەر” یێ سعوودیێ هاتنە ڤەگەراندن بۆ عێراقێ.
وەزارەتا دەرڤە ئاماژە ب وێ یەکێ ژی کر، کو نوکە ئامادەکاری دهێنە کرن دا کو د چەند رۆژێن داهاتی دا ئەو وەلاتیێن ل وەلاتێ هندستانێ گیرخوارین بهێنە ڤەگەراندن، ب تایبەتی ژی ئەو نەخۆشێن کو بۆ وەرگرتنا چارەسەریێ چوینە و ل وێرێ ماینە.
هەر د هەمان چارچۆڤە دا، وەزارەت د پەیوەندیێن بەردەوام دایە بۆ ڤەگەراندنا وان وەلاتیێن ل وەلاتێ لوبنانێ گیرخوارین، کو بڕیارە ب رێکا وەلاتی ئوردنێ بهێنە ڤەگەراندن.
ل دوماهیێ، وەزارەتا دەرڤە یا عێراقێ پێگیرییا خۆ دوپات کر کو دێ هەمی بزاڤان کەت بۆ ڤەگەراندنا هەر وەلاتیەکێ عێراقی یێ ل دەرڤەی وەلاتی گیرخواربیت، ئەڤە ژی ب هەماهەنگی دگەل دەزگەهێن پەیوەندیدار.
