رێڤەبەرێ ڕاگەهاندنا وەزارەتا بەڕەڤانیا عێراقێ ئاشکەرا کر، ب فەرمانا فەرماندەیێ گشتی یێ هێزێن چەکدار، بڕیارا خەرجکرنا پارەیێ رێزلێنانێ بۆ شەهید و بریندارێن هێزێن ئەمنی یێن عێراقێ، هێزێن پێشمەرگەی و هێزێن ئەمنی یێن هەرێما کوردستانێ ژی دێ گریت.
تەحسین خەفاجی، رێڤەبەرێ ڕاگەهاندنا وەزارەتا بەڕەڤانیا عێراقێ، د لێدوانەکا رۆژنامەڤانی دا راگەهاند: “ل دویڤ بڕیارێ، هەر بریندارەکێ پێشمەرگەی یێ کو د ئالۆزیێن ڤێ دوماهیێ دا بریندار بوبیت، کوژمێ پێنج ملیۆن دیناران وەک رێزلێنان دێ پێ هێنە دان، هەروەسا بۆ کەسوکارێن هەر شەهیدەکێ ژی کوژمێ 10 ملیۆن دیناران هاتیە تەرخانکرن.”
دەربارەی مەرجێن وەرگرتنا ڤی پارەیی، خەفاجی دیار کر کو پێدڤیە ناڤێن وان شەهید و برینداران ژ لایێ وەزارەتا پێشمەرگەی یا حکومەتا هەرێما کوردستانێ ڤە بهێنە پشتراستکرن، ئەوێن کو د روودان و ئالۆزیێن ڤێ دوماهیێ دا بوینە قوربانی.
ل دوماهیێ رێڤەبەرێ ڕاگەهاندنا وەزارەتا بەڕەڤانیێ ئاماژە ب وێ یەکێ کر، کو ئەو نوکە ل چاڤەڕێیا وەزارەتا پێشمەرگەی نە دا کو لیستان ب شێوەیەکێ فەرمی رەوانە بکەن، داکو دەست ب رێکارێن کارگێری و دارایی بۆ مەزاختنا وی پارەیی بهێتە کرن.
