بادینان دەیلی – رۆژهەلاتا ناڤەڕاست:
ئاژانسا نێڤدەولەتی یا وزێ هەنگاڤەکا نوو بۆ کۆنترۆلکرنا بهایێ نەفتێ و کێمکرنا کارتێکرنا شەڕێ رۆژهەلاتا ناڤەڕاست ل سەر بازاڕێن جیهانی دهاڤێژیت.
یەدەگێ ستراتیژی دهێتە بکارئینان
ئاژانسا نێڤدەولەتی یا وزێ د نووترین پێنگاڤا خۆ دا بۆ دابەزاندنا بهایێ نەفتێ، پێشنیاز کریە کو وەلاتێن خودان نەفت یێن کو نەفت عەمبارکری (یەدەگ) هەی، ب هەڤڕای مەزنترین بڕێ یەدەگێ خۆ بێخنە د بازاڕی دا. ئاژانسێ ئاماژە ب وێ یەکێ کر کو پێدڤیە ئەڤ وەلاتە ١٨٢ ملیۆن بەرمیلێن نەفتێ بێخنە بازاڕێن جیهانی دا کو رێگری ل گرانبوونا بهایێ وێ بهێتە کرن.
کارتێکرنا پێشنیازێ ل سەر بازاڕی
درۆست پشتی بەلاڤبوونا ڤێ پێشنیازێ، بهایێ نەفتێ ل بازاڕێن جیهانی ب رێژەیەکا بەرچاڤ دابەزی. د ڤێ دەربارێ دا، فاتح بیرۆڵ، رێڤەبەرێ جێبەجێکارێ ئاژانسا نێڤدەولەتی یا وزێ روونکر ژی کو ئەڤ هەنگاڤە دێ یارمەتیدەر بیت بۆ سەقامگیرکرنا بازاڕی و کێمکرنا نیگەرانییێن وەلاتان.
ئالۆزییێن گەروویێ هورمز
ئەڤ بڕیارە د دەمەکێ دایە کو ب ئەگەرێ جەنگێ ئیرانێ و ئەو مەترسییێن ل سەر کەشتییێن نەفتێ ل گەروویێ هورمز دروست بووین، بازاڕێن نەفتێ نە سەقامگیرن. ژ دەسپێکا شەڕی و هەتا نوکە، چەندین کەشتییێن نەفتێ هاتینە ئارمانجکرن و هاتنوچۆیا بازرگانی ل وی گەرووی ب ئاوایەکێ بەرچاڤ کێم بوویە.
مێژوویا بکارئینانا یەدەگێ ستراتیژی یێ نەفتێ ژ لایێ ڤێ ئاژانسێ ڤە بۆ دەمێن قەیرانێن مەزن دزڤریت؛ وەک چەوا د دەسپێکا شەڕێ رووسیا و ئۆکرانیا دا ژی هەمان هەنگاڤ هاڤێتبوو بۆ وێ یەکێ رێگریێ ل بلندبوونا ژ نیشکەکێ ڤە یا بهایێ نەفتێ بگریت.
ژێدەر: بادینان دەیلی
رێکەفت: ١١/٣/٢٠٢٦
