سەرۆکێ رووسیا ڕاگەهاند، زێدەبوونا ئالۆزیێن ل دەڤەرا ڕۆژهەلاتا ناڤین کارتێکرنەکا ڕاستەوخۆ ل سەر بلندبوونا تێچوویێ ووزەیێ ل سەرانسەری جیهانێ هەیە.
چوارشەمبی، 4ێ ئادارا 2026، ڤلادیمیر پۆتن سەرۆکێ رووسیا ڕایگەهاند کو بلندبوونا بهایێ غازێ ل وەلاتێن ئێکەتیا ئەوروپا، ئەنجامێ سیاسەتێن خەلەت یێن چەندین سالان یێن دەسهەلاتدارێن ئەوروپی یە. پۆتنی گۆت: “ئەو ڕەوشا ئەڤرۆ ل بازارێن ئەوروپا دهێتە دیتن، پەیوەندی ب بەرژەوەندیێن گەلێن وان وەلاتان ڤە نینە، بەلکو بەرهەمێ بڕیارێن نەدروست یێن وانە د کەرتێ ووزەیێ دا.”
هەڤپشکێن جهێ متمانەیێ
سەبارەت ب پەیوەندیێن بازرگانی، سەرۆکێ رووسیا ئاماژە دا کو وەلاتێ وی دێ بەردەوام بیت ل سەر کارکرنێ دگەل وان هەڤپشکێن کو جهێ باوەریێ نە، وەک وەلاتێن سلۆڤاکیا و هەنگاریا. پۆتنی گۆت ژی: “ئەم دێ بەردەوام بین د دابینکرنا نەوت و غازێ بۆ وان، ب وی مەرجی کو سەرکردایەتیێن وان وەلاتان ل سەر هەمان سیاسەتا خۆ یا نوکە بەردەوام بن و وەک هەڤپشکێن جهێ متمانەیێ ب مینن.”
هێرشەکا تیرۆرستی
د پشکەکا دی یا ئاخفتنێن خۆ دا، ڤلادیمیر پۆتنی هێرشکرنا سەر کەشتیەکا ڤەگوهاستنا غازا رووسی ل دەریایا سپی یا ناڤەراست وەک “کارەکێ تیرۆرستی” وەسف کر، بێی کو چو هویرکاریان ل سەر لایەنێ هێرشکار یان دەمێ ئەنجامدانا وێ هێرشێ بدەت.
کارتێکرنا شەڕێ دەڤەرێ
ئەڤ داخۆیانیێن سەرۆکێ رووسیا د دەمەکێ دا نە کو شەڕێ د ناڤبەرا ئێران، ئیسرائیل و ئەمریکا دا بۆ پێنج رۆژانە بەردەوامە. ب سەدەمێ ڤی شەڕی ژی، گەروویێ هورمز کو ئێکە ژ گرنگترین رێکێن ستراتیژی یێن ڤەگوهاستنا ووزەیێ ل جیهانێ، هاتیە گرتن. ئەڤ چەندە بوویە ئەگەرێ پهیدابوونا فشارەکا مەزن و بلندبوونا بهایێ نەوت و غازێ ل بازارێن جیهانی.
