سەرۆکێ هەرێما کوردستانێ، نێچیرڤان بارزانی، د پەیامەکا سەرەخۆشیێ دا بۆ وەغەرا دویماهیێ یا خودێ ژێ ڕازی “حسێن شێخ مستەفا”، ڕایەگەیاند کو ناڤبری ژیێ خۆ د خزمەتا پەروەردە و فێرکرنا نڤشێن نوی یێن کوردستانێ دا بۆراندیە.
ئەڤرۆ ئەینی، 6ێ ئادارا 2026ێ، نێچیرڤان بارزانی سەرۆکێ هەرێما کوردستانێ، پەیامەکا سەرەخۆشیێ ئاراستەی شێخ جەعفەر شێخ مستەفا، جێگرێ سەرۆکێ هەرێما کوردستانێ کر، ب هەلکەفتا وەغەرا دویماهیێ یا برایێ وی.
د پەیاما سەرۆکێ هەرێمێ دا هاتیە:
“پرسە و سەرەخۆشیێن خوە یێن کویر ئاراستەی شێخ جەعفەر و مالباتا وان یا نیشتمانپەروەر دکەین و د ڤێ خەمێ دا هەڤپشکین.”
هەروەسا سەرۆک نێچیرڤان بارزانی ئاماژە ب رۆل و پێگەیێ خودێ ژێ ڕازی دا و دیار کر: “وەک کەسایەتیەکێ پەروەردەیی و ڕێڤەبەرێ بەرێ یێ پەروەردەیا سلێمانیێ، ب دلسۆزی ژیێ خۆ د پێناڤ خزمەتکرنا پرۆسەیا خاندنێ و پەروەردەکرنا نڤشێن کوردستانێ دا بۆراند.”
ل دویماهیا پەیاما خۆ دا، سەرۆکێ هەرێما کوردستانێ دوعا و پاڕانە ل خودایێ مەزن کرن کو گیانێ وەغەری ب رەحم و دلوڤانیا خۆ شاد بکەت و ئارامی و سەبرێ بدەتە مالبات و کەسوکارێن وی.
