بارودۆخێ ئەمنی ل وڵاتێ مەکسیک ب تەمامی تێکچوویە و ئەڤ چەندە مەترسیەکا مەزن ل سەر بڕێڤەچوونا یارییێن مۆندیالا ٢٠٢٦ ل وی وڵاتی پەیدا دکەت. پێشبینی دهێتە کرن یارییا هەلبژارتیێ ئیراقێ د قۆناغا پاشکۆیا پالاوتنێن مۆندیالێ دا، کو بڕیارە هەیڤا بهێت ل باژێرێ “گوادالاخارا” بەرامبەر سەرکەفتیێ یارییا (سورینام و بۆلیڤیا) بهێتە ئەنجامدان، بۆ وڵاتەکێ دی بهێتە ڤەگوهاستن.
کێمتر ژ چار هەیڤان بۆ دەستپێکرنا مۆندیالا ٢٠٢٦ ماینە، لێ رەوشا ئەمنی یا مەکسیک وەک ئێک ژ وڵاتێن مێڤاندار تەواو شلەژایە. ژبەر کوشتنا ئێک ژ مەزنە سەرکردەیێن مافیایێن بازرگانیکرن ب ماددەیێن بێهۆشکەر، شەڕ و ئالۆزیێن دژوار ل چەندین باژێرێن مەکسیک سەرهەلدایە، ب رەنگەکێ کو کۆنترۆلا هندەک دەڤەران ژ دەستێ حکومەتێ دەرکەفتیە.
بڕیاربوو مەکسیک مێڤاندارییا ١٣ یارییێن مۆندیالێ بکەت، لێ نوکە ئەو یاری د مەترسیێ دانە. ژ وان ژی یارییا چارەنڤیسساز یا هەلبژارتیێ ئیراقێ کو بڕیارە ل باژێرێ “مۆنتێری” بهێتە کرن. رۆژ ب رۆژ کریارێن تێکدەرانە یێن گرووپێ چەکدارێ “ئێل مینچۆ” (کو سەر ب مافیایێ کوژرای یێ ماددەیێن بێهۆشکەرە) پتر ل باژێرێن مەکسیک بەلاڤ دبن، لێ تا نوکە (فیفا) چ هەلوێستەکێ فەرمی و ئاشکرا دەرنەبڕیبوو.
باژێرێن (مەکسیکۆ سیتی، مۆنتێری و گوادالاخارا) هاتبوونە دەستنیشانکرن بۆ مێڤاندارییا یارییان، ژ وان ژی یارییا دەستپێکێ د ناڤبەرا مەکسیک و ئەفریقیا باشوور، هەروەسا یارییا ب هێز یا ئیسپانیا و ئۆرۆگوای.
ل دووماهی پێشهات، لیژنا تەنگاڤییان ل فیدراسیۆنا نێڤدەولەتی یا تەپاپێی (فیفا) بڕیار دایە ژ نێزیک چاڤدێرییا رەوشێ بکەت دا کو بۆ هەر رویدانەکا نەخواستی یێ ئامادە بیت. ئەگەر ئەڤ ئالۆزییە بەردەوام بن، دویر نینە (فیفا) مافێ مێڤانداریێ ژ مەکسیک وەربگریت و هەمی یارییان ل سەر هەردوو وڵاتێن دی یێن مێڤاندار (ئەمریکا و کەنەدا) دابەش بکەت.
