فرانك هوگربيتس، لێکۆلەر و زانایێ هۆڵەندی یێ ناڤدار ب پێشبینیکردنا بومەلەرزان، جارەکا دی هۆشدارییەکا مەترسیدار و بەلەز ئاراستەی دانیشتووانێ زەڤیێ دکەت. هوگربیتس ڕادەگەهینیت کو ب ئەگەرێ دیاردەکا فەلەکی یا دەگمەن، جیهان ل بەرامبەر مەترسیا بومەلەرزەکا گەلەک ب هێز دایە.
دیاردەکا دەگمەن کو ٣٦ سالان جارەکێ رویددەت
هوگربیتس د نووترین پۆستا خوە دا ل سۆشیال میدیایێ ئاماژێ ب وێ چەندێ دکەت کو ل رۆژا ٢٠ێ شوباتێ، ئەرد دێ کەڤیتە د “هەڤبەندیا زوحەل و نەپتون” دا. ئەڤ دیاردەیە ل هەر ٣٦ سالان تەنێ جارەکێ رویددەت، ئەڤ چەندە ژی وای ل ڤی لێکۆلەری کریە کو ڤێ ماوەی وەک “ماوەیەکێ مەترسیدار” بناسێنیت.
پێشبینیا بومەلەرزەکا ٧ پلەیی
ب گۆتەی ڤی زانای، نەک تەنێ هەسارە، بەلکو مانگ ژی دێ د هەمان هێل دا بیت ل گەل زوحەل و نەپتون. ئەڤ لێککەفتنا فەلەکی دێ فشارەکا مەزن ئێخیتە سەر توێکڵێ ئەردی.
خالێن سەرەکی یێن پێشبینیا وی:
- دەمێ مەترسیێ: دناڤبەرا ١٩ تا ٢١ێ شوباتێ.
- رۆژا هەرە گرنگ: ٢٠ یان ٢١ێ شوباتێ.
- هێزا بومەلەرزێ: پێشبینی دکەت ب هێزا ٧ پلەیێن رێختەر یان زێدەتر بیت.
هوگربیتس و بومەلەرزەیا تورکیا
ناوبانگا جیهانی یا فرانك هوگربيتس، سەرۆکێ رێکخراوا (SSGEOS)، پشتی وێ چەندێ هات کو سێ رۆژان پێش بومەلەرزەیا کارەساتبارا شوباتا ٢٠٢٣ێ یا تورکیا و سوریێ، پێشبینیا رویدانا وێ کربوو، کو تێدا پتر ژ ٥٠ هزار کەسان گیانێ خوە ژ دەست دا.
زانست چ دبێژیت؟
هەرچەندە پێشبینیێن هوگربیتس ل سۆشیال میدیایێ دەنگڤەدانەکا مەزن دروست دکەن، بەلێ زانایێن جیۆلۆجی یێن جیهانێ هێشتا ب گۆمان سەیری ڤان پێشبینیان دکەن. زانایێن زانکۆیێن مەزن دبێژن: “هەتا نوکە چو رێبازێن زانستی نینن کو بشێن دەم و جهێ بومەلەرزێ ب رێکا لڤینا هەسارەیان دیار بکەن.”
هوگربیتس داخوازێ ژ خەلکی دکەت کو یێ ئامادەبن و ڤێ هۆشداریێ ب سادەیی وەرنەگرن، چونکە هێزا بومەلەرزێ پەیوەندی ب ئاستێ فشارا کومبوویی ل سەر توێکڵێ ئەردی هەیە.
