ڤەکۆلینێن نوی ئاماژێ ب وێ چەندێ ددەن کو ئەو کەسێن کێماسیا ماددێ “زینک”ی د لەشێ خۆ دا هەین، رەنگە ب بکارئینانا دەرمانێن تەواوکەر هەست ب باشتربوونا خەو و بلندبوونا ئاستێ وزەیا خۆ بکەن. لێ شارەزا دبێژن کو هێشتا بەلگەیێن گشتی نەگەهشتینە وی ئاستی کو شیرەتێ ل هەموو کەسان بکەن کو بۆ ڤی مەرەمی زینکێ بکاربینن.
پەیوەندیا زینک و خەوێ:
• بەلگەیێن زانستی لسەر کارتێکرنا زینکێ لسەر خەوێ هێشتا ئێکلاکەر نینن.
• هندەک ڤەکۆلینان دیار کریە کو وەرگرتنا 30 میلیگرام زینک رۆژانە دشێت خەوێ ل دەڤ کەسێن خودان تەمەن و نەخۆشێن گورچیسکان باشتر بکەت.
• لێ د ڤەکۆلینێن دی دا، چ باشتربوون ل دەڤ وان کەسان نەهاتیە دیتن یێن کو ئاریشەیێن ماندووبوونا درێژخایەن یان خەمۆکیێ هەی.
زینک و ئاستێ وزەیێ
• ئاماژەیێن سنوردار هەنە کو دیار دکەن زینک دشێت ماندووبوونێ کێم بکەت، ب تایبەتی ل دەڤ کەسێن کو ئاستێ زینکێ وان نزمە.
• بۆ نموونە، ل دەڤ کەسێن سەر 60 سالیێ و نەخۆشێن شێرپەنجا کۆلۆنێ کو چارەسەریا کیمیایی وەردگرن، زینکێ هاریکاریا کێمکرنا ماندووبوونێ کریە.
• لێ دیسان ژی، هێشتا بەلگە بەس نینن کو زینک وەک چارەسەریەکا مسۆگەر بۆ زێدەکرنا وزەیێ بهێتە پێشنیارکرن.
بۆچی زینک گرنگە؟
لەشێ مرۆڤی پێدڤی ب زینکێ هەیە بۆ بەرهەمئینانا هورمۆن و گوهێزەرێن دەماری (وەک “میلاتۆنین”) کو خەو و هشیاریێ رێکدئێخن. هەروەسا، سیستەمێ بەرگریێ بهێز دکەت و ب ڤێ یەکێ ماندووبوونێ کێم دکەت.
پێدڤیا رۆژانە یا زینکێ:• زەلام: 11 میلیگرام
• ژن: 8 میلیگرام
• ژنێن دووگیان و شیردەر: 11 بۆ 12 میلیگرام
ژێدەرێن سەرەکی یێن زینکێ: گۆشت، ماسی، بەرهەمێن شیری و هێک.
ئامۆژگاری: زینک تنێ ئەو دەم مفای دگەهینیت کو کێماسی د لەشی دا هەبیت. بەریا هەر تەواوکەرەکێ خۆراکی بکاربینی، ب تایبەتی ئەگەر تە دەرمانێن دی هەبن، پێدڤیە پرسێ ب نوشدارێ خۆ بکەی.
