بۆ جارا ئێکێ، ڤەکۆلەرێن ئەمریکی ڕادەگەهینن کو ڕاهێنانەکا سادە و ئەرزان یا مێشکی، نەک دەرمانێن گرانبەها، دشێت مەترسیا تووشبوون ب خەلەفانێ (دیمێنشیا) ب ڕێژەیا ٢٥٪ کێم بکەت. ئەڤ دۆزینەوەیە د ڤەکۆلینەکا نوو دا هاتیە بەلاڤکرن کو ئەنجامێن وێ ل ڕۆژا دوشەمبی، ٠٩-٠٢-٢٠٢٦، دیار بووینە.
ئەڤ ڕاهێنانە کو ب ناڤێ “Double Decision” دهێتە نیاسین و د بەرنامێ (BrainHQ) دا بەردەستە، پێکدهێت ژ کلیککرن ل سەر وێنەیێن ترۆمبێلان و نیشانێن هاتنوچوونێ یێن کو ل جهێن جودا یێن شاشەیا کۆمپیوتەری دیار دبن.
مارلین ئەلبێرت، ژ زانکۆیا جۆنز هۆپکینز، دبێژیت: “ئەم وسا هزردکەین کو ئەڤ ڕاهێنانە کار دکەتە سەر پەیوەندیێن د ناڤ مێشکی دا. ئێک ژ خالێن گرنگ ئەوە کو ڕاهێنانەکە دگەل شیانێن کەسی دگونجیت، یانی ب پێی پێویستی ب ساناهیتر یان ب زەحمەتتر لێ دهێت.”
ئەڤ دۆزینەوەیە نەک تنێ بۆ تەندروستیێ گرنگە، بەلکو ل ئالیێ ئابووری ڤە ژی دشێت گۆڕانکاریێن مەزن بکەت:
•کێمکرنا تێچووی: کێمکرنا ڕێژەیا خەلەفانێ ل ئەمریکا دشێت ١٠٠ ملیار دۆلاران ژ خەرجیێن چاڤدێریا نەخۆشان کێم بکەت.
•ئامارا جیهانی: ب گۆڕەی ڕێکخراوا تەندروستیا جیهانی (WHO)، ٥٧ ملیۆن کەس ل جیهانێ تووشی خەلەفانێ بووینە و ئەڤ نەخۆشییە حەفتەمین ئەگەرێ سەرەکی یێ مرنێیە ل جیهانێ.
ڤەکۆلەر هۆشداریێ ددەن کو تنێ ئەڤ جۆرێ دیارکری یێ ڕاهێنانێ مفادار بوویە، و مەرەم پێ ئەوە نینە کو هەمی یاریێن مێشکی هەمان کاریگەری هەبیت. ئەڤ ڤەکۆلینە د گۆڤارا زانستی یا (Alzheimer’s and Dementia: Translational Research & Clinical Research) دا هاتیە بەلاڤکرن.
جۆرێن ڕاهێنانێ
پشکدار ل سەر سێ کۆمەڵەیێن جودا هاتبوونە پارڤەکرن، هەر ئێک ژ وان جۆرەکێ ڕاهێنانێ ئەنجام ددا:
1.ڕاهێنانا خێرایێ (Speed Training): تنێ ئەڤ جۆرە مفادار بوو و مەترسیا خەلەفانێ ب ٢٥٪ کێم کر.
2.ڕاهێنانا بیردانکێ (Memory Training): چ جوداهییەکا ئاماری یا گرنگ نیشان نەدا.
3.ڕاهێنانا لۆژیکی (Logic Training): چ جوداهییەکا ئاماری یا گرنگ نیشان نەدا.
