ڕێڤەبەریا گشتی یا حەج و عومرێ یا سەر ب وەزارەتا ئەوقاف و کاروبارێن ئایینی یا حکومەتا هەرێما کوردستانێ، چەند ڕێنمایی و مەرجێن نوو ئاراستەی کۆمپانیێن حەج و عومرێ کرن، ب مەرەما ڕێکخستنا گەشتان و پاراستنا مافێن وەلاتییان. ڕێڤەبەریێ تەئکید کر، کو خزمەتکرنا عومرەکارێن هەرێما کوردستانێ هێلا سۆرە و ڕێ ناهێتە دان ب چو شێوەیان پێشێلکاری بەرامبەر مافێن وان بهێتە کرن یان تووشی نەخۆشییان ببن، بەروڤاژی کۆمپانیێن سەرپێچیکار دێ ڕووبەڕووی سزایێن توند بن.
ڕێکارێن بەری گەشتێ و پابەندیێن کارگێڕی, ل دویف ڕێنماییێن نوو، کۆمپانی هاتینە پابەندکرن کو بەری گەشتێ دەمێ چوون و زڤرینێ و بەرنامێ هویر یێ گەشتێ ب شێوێ نڤیسار یان برۆشۆر ڕادەستی عومرەکاران بکەن. هەروەسا دڤێت 48 دەمژمێر بەری گەشتێ، مەنەفێستا ناڤێن عومرەکاران ڕادەستی نڤیسینگەیێن حەج و عومرێ ل باژێران بهێتە کرن. مەرجەکێ دی ژی ئەوە، نابیت چو عومرەکار بهێتە برن بۆ فرۆکەخانێ یان دەروازێ عەرعەر بەری ڤیزا وی دەربکەڤیت، دگەل هندێ ژی، نابیت چو کۆمپانی بێی ئامادەبوونا خودانێ وێ یان کارمەندەکێ ڕێپێدای گەشتێ ئەنجام بدەت.
خزمەتگوزاریێن ئاکنجیبوون و خوارنێ, ڕێڤەبەریا گشتی یا حەج و عومرێ جەخت ل سەر هندێ کریە، کو نابیت ب چو شێوەیان ئۆتێلا عومرەکاران بهێتە گوهۆڕین یان ڕۆژێن مانەوا وان ل مەککە و مەدینێ بهێنە کێمکرن، پێدڤیە ئاکنجیبوون و نانخوارن د هەمان ئۆتێل دا بن و ڕێ ناهێتە دان عومرەکار بۆ نانخوارنێ بچنە جهەکێ دی، یان کۆمەک د ئێک گەشت دا ل سەر دو ئۆتێلێن جودا بهێنە دابەشکرن. سەبارەت خوارنێ ژی، دڤێت جۆرێ خوارنێ یێ باش بیت و بڕا وێ ل دویف ژمارا عومرەکاران بیت، ب جۆرەکێ ڕێ ناهێتە دان خوارنا 30 کەسان بۆ 40 کەسان بهێتە دابەشکرن.
